Դեկտեմբերի 1-ին, Գյումրիում տեղի ունեցած ՄԻԱԿ-ի նորընտիր խորհրդի առաջին նիստի օրակարգում ներառված էր նաև նախագահական ընտրություններում ՄԻԱԿ-ի քաղաքական դիրքորոշման ճշգրտման հարցը: Նիստին մասնակցում էին խորհրդի 19 անդամներից 18-ը:

Խորհրդի անդամները կարևորեցին առաջիկա համապետական ընտրությունների` ժողովրդավարության ոգուն համապատասխան, ազատ և թափանցիկ անցկացման անհրաժեշտությունը, շեշտեցին դրանց բացառիկ նշանակությունը Հայաստանի քաղաքական համակարգի հետագա զարգացման, երկրում բարեփոխումների հետագա խորացման, պետության առջև ծառացած արտաքին ու ներքին մարտահրավերների դիմագրավման գործում: Խորհրդի անդամները կարծիքներ փոխանակեցին ներքաղաքական ընդհանուր իրավիճակի և նախագահական ընտրություններում ՄԻԱԿ-ի դիրքորոշման հարցի շուրջ:

Քննարկումներից հետո ՄԻԱԿ-ի խորհուրդը միաձայն որոշեց չառաջադրել սեփական թեկնածու և առաջիկա նախագահական ընտրություններում աջակցել ՀՀ նախագահի թեկնածու, ՀՀ վարչապետ Սերժ Սարգսյանի թեկնածությունը: Խորհուրդը ձևակերպեց այն 10 հիմնական պատճառները, ինչի համար ՄԻԱԿ-ը սատարում է ՀՀ նախագահի թեկնածու Սերժ Սարգսյանին: Միաժամանակ, որպես մեր կյանքում իրական փոփոխությունների ձգտող, որպես ապագայի քաղաքական ուժ, ՄԻԱԿ-ի խորհուրդը ձևակերպեց այն 10 հիմնական փոփոխությունները, որ ՄԻԱԿ-ն ակնկալում է ՀՀ նախագահ Սերժ Սարգսյանին: Խորհրդի նիստից հետո ՄԻԱԿ-ի նորընտիր Գլխավոր քարտուղար Սամվել Ֆարմանյանը, քարտուղար Լևոն Մարտիրոսյանը և ՄԻԱԿ-ի Խորհրդի խոսնակ Կարեն Մաթևոսյանը պատասխանեցին լրագրողների հարցերին:

10 ՊԱՏՃԱՌ, ԻՆՉՈՒ ՄԻԱԿ-Ը ՍԱՏԱՐԵՑ ՍԵՐԺ ՍԱՐԳՍՅԱՆԻՆ

1. Առաջ է քաշել երկրում II սերնդի բարեփոխումների իրականացման լուրջ ծրագիր:
2. Փարձառու է և մեծ ներդրում ունի անկախ պետականության կերտման գործում:
3. Արցախյան հակամարտության և հայ-թուրքական հարաբերությունների կարգավորման վերաբերյալ տեսակետները կանխատեսելի են:
4. Քաղաքական կայունության, համերաշխության և ազային միասնության կողմնակից է:
5. Բազմակողմանիորեն տեղեկացված է և տիրապետում է երկրում առկա բոլոր խնդիրներին:
6. Հավասարապես ընկալելի և ընդունելի է աշխարհի բոլոր քաղաքական կենտրոնների կողմից:
7. Վարչապետության կարճ շրջանում կրկնակի աճել է երկրի պետական բյուջեն, 60%-ով բարձրացվել են կենսաթոշակները:
8. Ուժեղ անհատ է և ուժեղ առաջնորդ:
9. Արդյունավետ կառավարիչ է և լավ կազմակերպիչ:
10. Վայելում է հասարակության մեծամասնության վստահությունը:

10 ՓՈՓՈԽՈՒԹՅՈՒՆ, ՈՐ ՄԻԱԿ-Ն ԱԿՆԿԱԼՈՒՄ Է ՀՀ ՆԱԽԱԳԱՀ ՍԵՐԺ ՍԱՐԳՍՅԱՆԻՑ

1. Երկրորդ սերնդի բարեփոխումների իրականացում և լայնածավալ կառուցվածքային բարեփոխումներ:
2. ԵՄ-ին անդամակցության չափանիշների բավարարումը որպես Հայաստանի ներքին և արտաքին քաղաքականության առաջնահերթության հռչակում:
3. Պետության դերի նվազեցում, տնտեսական ազատ մրցակցության և հավասար հնարավորությունների ապահովում, մենաշնորհների վերացում:
4. Իրավապահ մարմինների հրաժարում պետության սպասարկումից, ի օգուտ հասարակության և անհատի սպասարկման:
5. Հավասարություն օրենքի առջև և բոլոր իրավախախտների համար պատժի անխուսափելիություն:
6. Կադրային համարձակ փոփոխություններ, միջին և բարձրագույն օղակներում երիտասարդ կադրերի ներգրավում:
7. Կոշտ պայքար կոռուպցիայի և ստվերային տնտեսության դեմ:
8. Արցախյան հակամարտության խաղաղ և արժանապատիվ կարգավորում, առաջընթաց հայ-թուրքական հարաբերություններում:
9. Գործազրկության կրճատման, Երիտասարդ-նորաստեղծ ընտանիքներին բնակարանային աջակցության և Ներգաղթի խթանման Ազգային ծրագրերի իրականացում:
10. Հարկային համակարգի ֆիսկալ դերի փոփոխություն գործընկերոջ և ծառայություն մատուցողի դերով: