Լոս Անջելեսում 50 տարեկան հասակում մահացել է Մայքլ Ջեքսոնը: "Փոփ-երաժշտության արքա" տիտղոսին արժանացած այս հիրավի տաղանդավոր և աննկարագրելի կամքի ուժ ունեցող մարդը երաժշտության պատմության մեջ ամենահաջողակ երգիչներից մեկն է: Երաժշտական կյանք մտնելով 5 տարեկան հասակից, նա ինքնուրույն է անցել դժվարին ուղի` բազմազավակ հասարակ ընտանիքի սևամորթ տղայից դառնալով "Արքա", դառնալով մարդ, ում ճանաչում է ողջ աշխարհը:

Նրա Thriller ալբոմը գրանցվել է Գինեսի ռեկորդների գրքում որպես բոլոր ժամանակների և ժողովուրդների ամենավաճառվող ալբոմը։

Չկա որևէ մեկը, ում հոգին հուզած չլինեն նրա երգերը, ով փորձած չլինի կրկնօրինակել նրա հռչակավոր "Լուսնային քայլվածքը", ով չիմանա նրա անվան շուրջ պտտվող սկանդալային պատմությունները: Արդարացիորեն լինելով աշխարհի ամենաճանաճված երգիչ, նա մարտահրավեր է նետել անգամ բնությանը` փոխելով մաշկի գույնը:

Մայքլ Ջեքսոնի մահվան լուրը ցնցել է բոլորին։ Լեգենդար փոփ-արքայի ընտանիքի անդամները, ընկերները, գործընկերները և պարզապես նրա արվեստի երկրպագուները չեն կարողանում համակերպվել 50-ամյա երգչի կորուստի հետ:

Փոփ-երգչուհի Մադոննան նշել է, որ լսելով Ջեքսոնի մահվան մասին, անվերջ արտասվում է."
-Ես միշտ հիացել եմ Մայքլ Ջեքսոնով։ Աշխարհը կորցրեց ամենալավ երգիչներից մեկին, սակայն նրա երաժշտությունը հավերժ կապրի",- հայտարարել է երգչուհին։

Մեկ այլ հանրահայտ կատարող Սելին Դիոնը հայտնել է, որ ցնցված է այդ ողբերգությամբ.
-"Մայքլ Ջեքսոնն ինձ համար կուռք է եղել ողջ կյանքումս։ Նա ոչ միայն տաղանդավոր անձնավորություն էր, այլ հանճար։ Սա մեծ աննկարագրելի կորուստ է",- ասել է Դիոնը։

Ջեքսոնը մահացել է սրտի տագնապից: