Զանգվածայնացման ծրագրի առաջին փուլի աշխատանքների արդյունքում Հայաստանի մարզերում արդեն իսկ բացվել են թվով 9 տարածքային ստորաբաժանում:

Հուլիսի 24-ին ՄԻԱԿ-ի կենտրոնական գրասենյակում տեղի ունեցավ ոչ ֆորմալ հավաք, որին մասնակցում էին ներկայացուցիչներ այդ 9 կառույցներից, ինչպես նաև Երևանի տարածքային ստորաբաժանումից: Հանդիպման նպատակը ՄԻԱԿ-ի քարտուղարության անդամների, կանոնադրական հանձնաժողովի աշխատանքների ներկայացնելն էր, տարածքներում աշխատանքների կազմակերպումը, մարզային հիմնախնդիրների վերծանումը և հնարավոր լուծման ուղիների որոնումը: Հավաքը կազմակերպվում էր առաջին անգամ, ուստի և պատեհ առիթ էր տարածքային ստորաբաժանումների համար միմյանց հետ ծանոթանալու և իրար ճանաչելու:

Ողջունելով հավաքվածներին, ՄԻԱԿ-ի գլխավոր քարտուղար Արա Հովսեփյանը համոզմունք հայտնեց, որ աշխատանքները անպայմանորեն դրական հունով են գնալու, քանի որ մարզային ներկայացուցիչները պատրաստակամություն են հայտնել լծվելու դժվարին մի աշխատանքի, այն է` քաղաքական գործունեությունը մարզային մակարդակով:

Քարտուղար Լևոն Մարտիրոսյանը, պատասխանելով հարցերին, նշեց, որ ՄԻԱԿ-ը ձեռնամուխ է լինելու Հայաստանի զարգացմանը միտված և պետության համար անհրաժեշտ ծրագրերի մշակմանը, հավատացնելով, որ մեծ ուշադրություն է դարձվելու մարզային զարգացմանը:

Գաղափարական գծով քարտուղար Գերասիմ Բարսեղյանի պնդմամբ, աներկբա է ՄԻԱԿ-ի զբաղեցրած ուրույն և անփոխարինելի դիրքը հայաստանյան քաղաքական դաշտում, քանզի այն գործող կառույց է և առաջ է քաշում իրատեսական նպատակներ:

Արտաքին կապերի և PR գծով քարտուղար Նաիրա Կարապետյանը հորդորեց ներկաներին ակտիվ աշխատել տեղական ՀԿ-ների հետ` չշեղվելով ՄԻԱԿ-ի ծրագրային դրույթներից և գաղափարախոսությունից: Նշվեց նաև, որ ՄԻԱԿ-ի առանձնահատկություններից է ներքին ժողովրդավարությունը, ինչը ենթադրում է մարզային կառույցների նախաձեռնողական աշխատանք:

Կանոնադրական հանձնաժողովի նախագահ Կարեն Մաթևոսյանը ևս մեկ անգամ հիշեցրեց, որ մեծ ուշադրություն է պետք դարձնել ներքին օրինապահության վրա, վարել անթերի թղթաբանություն:

Հավաքը առաջինն էր, պայմանավորվածություն ձեռք բերվեց ավելի հաճախ կազմակերպել նման հանդիպումներ: