ՄԻԱԿ-ը 2007 թ. դեկտեմբերի 1-ին, Գյումրիում կայացած իր երկրորդ արտահերթ համագումարում որոշում էր կայացրել` առաջիկա նախագահական ընտրություններում աջակցել ՀՀ նախագահի թեկնածու Սերժ Սարգսյանին, բերելով տաս պատճառ, թե ինչու է աջակցում նախագահի թեկնածուին և հրապարակելով այն տաս փոփոխությունները, որ ակնկալում է ՀՀ նախագահ Սերժ Սարգսյանից:

Հավատարիմ երկրի քաղաքական զարգացումներում ակտիվորեն ներգրավված լինելու մասին իր հայտարարությանը` ՄԻԱԿ-ի անդամները և համակիրներն այս օրերին, Դռնեդուռ նախաձեռնության շրջանակներում ակտիվորեն այցելում են մեր համաքաղաքացիներին և նրանց փոխանցում ՄԻԱԿ-ի կայացրած որոշումներն ամփոփող տեղեկատվական նյութեր, փորձում քաղաքացիներին հուզող խնդիրները և մոտեցումները լսելի դարձնել տեղական և հանրապետական իշխանության համապատասխան մարմինների համար:

Նախընտրական քարոզարշավի շրջանակներում ՄԻԱԿ-ի և Հույս երիտասարդական շարժման ներկայացուցիչները, ովքեր ներգրավված են Դռնեդուռ ծրագրում, հունվարի 26-ին հանդիպեցին ՀՀ նախագահի թեկնածու Սերժ Սարգսյանին: Սերժ Սարգսյանը շնորհակալություն հայտնեց ՄԻԱԿ-ին աջակցության համար և բարձր գնահատեց ՄԻԱԿ-ի կողմից իրականացվող Դռնեդուռ ծրագիրը:

Այս սերնդի բոլոր ներկայացուցիչները քաջ գիտակցում են, որ եթե Սերժ Սարգսյանին հաջողվի կատարել իր նախընտրական ծրագրում նախանշված բոլոր գաղափարներն ու ծրագրերը, ապա առաջին հերթին օգտվելու են հենց իրենք` երիտասարդները: Իրենք են, որ ապրելու են ավելի ապահով, ավելի բարեկեցիկ երկրում, իրենք են, որ ապրելու են ավելի ազատ ու ժողովրդավարական, եվրոպական չափանիշներին համապատասխան երկրում, իրենք են, որ ավելի մեծ հնարավորություններ են ունենալու իրենց երկրում,- ՀՀ նախագահի թեկնածու Սերժ Սարգսյանի հետ հանդիպման ժամանակ հայտարարեց ՄԻԱԿ-ի խորհրդի անդամ Լևոն Մարտիրոսյանը:
ՄԻԱԿ-ի գերխնդիրը մեր կյանքում փոփոխություններն են` դրական փոփոխությունները: ՄԻԱԿ-ի ակնկալիքը նախագահական ընտրություններից մեկն է. երկիրը հնարավորություն ստանա գնալու տարողունակ փոփոխությունների ճանապարհով և մենք Սերժ Սարգսյանի մոտ տեսնում ենք բավարար քաղաքական կամք և տեսլական` գնալու այդ ճանապարհով:

 "Մենք հայտարարել ենք, որ ակտիվ ենք լինելու քաղաքական բոլոր գործընթացներում և այդպես լինելու է, մենք հայտարարել ենք, որ եկել ենք քաղաքականություն և այնտեղ լինելու ենք հավերժ, հայտարարել ենք, որ միևնույնն է առանց մեր, առանց մեր սերնդի ներգրավման և մասնակցության Հայաստանը ժամանակակից աշխարհում շատ առաջ գնալ չի կարող և ունենք բավարար կարողություններ ու վճռականություն` գնալու Հայաստանը զարգացած, ապահով և բարեկեցիկ երկիր դարձնելու ճանապարհով",- նշեց ՄԻԱԿ-ի գլխավոր քարտուղար Սամվել Ֆարմանյանը: Վերջինս շնորհակալություն հայտնեց գործընկեր կառույցներին, ծրագրում ներգրավված դաշտային աշխատողներին, ծրագրի վարչական և տեխնիկական աշխատակազմին կատարվող արդյունավետ աշխատանքի համար:

Հանդիպման վերջում ՄԻԱԿ-ի քարտուղարությունը ՀՀ նախագահի թեկնածու Սերժ Սարգսյանին նվիրեց Դռնեդուռ ծրագրի կամավորների համար նախատեսված հատուկ համազգեստ: