Ամփոփվեցին "Լեռնային Ղարաբաղ. Ճշմարտություն և փաստեր" ծրագրի արդյունքները և ստացված արձագանքները: Շուրջ 100 երկրներ ուղարկված 4 միլիոնից ավել նամակների պատասխաններին հիմնվելով` Միացյալ Ազատական Ազգային Կուսակցությունը փաստեց ծրագրի հաջողությունը:

 

Հարկ է նշել, որ ՄԻԱԿ-ի կողմից մշակված այս փաստաթուղթը հավանության է արժանացել նաև ՀՀ Արտաքին գործերի նախարարության կողմից, և նրա հասցեական տարածումն աշխարհի ազդեցիկ գործիչներին իր ներդրումն ունեցավ տեղեկատվական հակահարվածի գործում` ի հակակշիռ հարևան պետության կողմից համացանցում համառորեն տարածվող տեղեկատվական հերյուրանքին: 

Ավելին, այս նախաձեռնությունը ապացուցեց նաև, որ մինչ օրս աննախադեպ այսօրինակ միջոցառումներում ևս հայ երիտասարդները կարող են լինել արժանի հակակշիռ` համացանցային տեղեկատվական տեխնոլոգիաների կիրառման գործում:

 

Արձագանքները տարրաբնույթ են, գերակշռում են շնորհակալական նամակները` փաստաթուղթը ներկայացնելու համար, որոշակի ճշտումներ` պատմական փաստերի վերաբերյալ, կան նաև հարևան պետության ոչ ադեկվատ արձագանքներ` սպառնալիքներ, վիրավորանք, կայքի և հասցեների համացանցային գրոհներ:

Մայիսի 20-ին ՀՀ Նախագահ Սերժ Սարգսյանը հանդիպեց ՄԻԱԿ-ի շուրջ 2000 ակտիվիստների հետ: ՀՀ Նախագահին ներկայացվեց "Լեռնային Ղարաբաղ. Ճշմարտություն և փաստեր" ծրագիրը :

 

Նախագահը ծանոթացավ ՄԻԱԿ-ի կողմից հավաքված տվյալների բազային` հասցեատերերին,  ում ուղարկվել էր թվով չորս միլիոն նամակ, զրուցեց ակտիվիստների հետ, քաջալերեց նրանց` բարձր գնահատելով նրանց կողմից կատարված աշխատանքը.

 

"Կուսակցության համար 4 տարին մեծ ժամանակահատված չէ, և ձեր կուսակցությունը դեռևս պետք է անցնի տևական ճանապարհ՝                                                                  կայանալու, ավանդույթներ ձևավորելու առումով:

 

Իհարկե, շատ ողջունելի է, որ կուսակցությունում միայն երիտասարդներ են ընդգրկված, և այս չորս տարիների ընթացքում ինչ-որ չափով դուք ընկալելի եք դարձել մեր հասարակության համար:

 

Ողջունում եմ բոլոր այն երիտասարդներին, ովքեր հաճույքով մասնակցում են հասարակական-քաղաքական գործընթացներին և այդ ընթացքում փորձում իրենց ավանդը բերել մեր երկրի զարգացման գործին:

 

Ես այս կարճ ժամանակահատվածում ծանոթացա նաև ձեր նախաձեռնությանը, այն աշխատանքին,  որ դուք այս ընթացքում կատարել եք՝  փորձելով Լեռնային Ղարաբաղի խնդրի մասին ճշմարիտ տեղեկատվություն հաղորդել աշխարհին: Իհարկե, շատ գովելի նախաձեռնություն է և շնորհակալ աշխատանք երկու առումով. նախ՝ դա մեր ամենացավոտ հարցերից մեկն է,  մեր առջև ծառացած ամենամեծ խնդիրներից մեկը:

 

Եվ չնայած,  մենք հսկայական ջանքեր ենք գործադրում, չնայած,  որ այս խնդիրն արդեն քսան տարուց ավելի է գոյություն ունի, ցավոք, աշխարհում դեռևս կան շատ մարդիկ, հասարակական-քաղաքական գործիչներ, ովքեր ծանոթ չեն հիմնախնդրին,  ովքեր ճշմարիտ տեղեկատվություն չունեն, հատկապես, որ մեր հակառակորդները որևէ միջոցից չեն խորշում` ապատեղեկատվություն հաղորդելու միջազգային հանրությանը:

 

Եվ երկրորդ՝ սա ձեր նախաձեռնությունն է, ձեր ինքնուրույն որոշումը: Միշտ էլ պետք է ողջունել այսպիսի ինքնուրույն քայլերն ու ցանկությունը, մասնակից լինելու մեր երկրի առջև ծառացած խնդիրների լուծմանը:

 

Մեր հասարակության բոլոր ոլորտներում տեղի է ունենում սերնդափոխություն, գալիս են լավ կրթություն ստացած,  բանիմաց,  ժամանակակից աշխարհի հետ շփվել կարողացող,  հավակնոտ և աշխատասեր մարդիկ, ովքեր ցանկանում են իրենց աշխատանքով, իրենց եռանդով լինել հաջողակ՝  թե անձնապես,  թե որպես մեր երկրի քաղաքացի:

 

Իհարկե, սա շատ ողջունելի է: Միայն սրանով Հայաստանը կարող է լինել մրցունակ, և միայն այսպես մենք կարող ենք հասնել մեծ հաջողությունների:

 

Ես մեկ անգամ ևս շնորհավորում եմ ձեզ, մաղթում` հաջողություն և,  իհարկե,  շատ շնորհակալ եմ կատարած աշխատանքի համար», - ասաց Նախագահը: ՄԻԱԿ-ի անդամները նրան նվիրեցին իրենց կողմից պատրաստված և տարբեր լեզուներով թարգմանված փաստաթղթի օրինակները: