Այս ուրբաթ երեկոյան ՄԻԱԿ-ի գրասենյակում առանձնահատուկ ուրախ տրամադրություն էր տիրում` երիտասարդները տոնում էին Հելլոուին (Halloween): 

Հելլոուինը, կամ ինչպես ընդունված է ասել` Բոլոր Սրբերի տոնի նախօրյակը, հին կելտական տոն է: Այն ունի մոտ 2 հազար տարվա պատմություն: Նշվում է հոկտեմբերի  31-ին:  VII դարում Հայր Բոնիֆացի 4-ը նոյեմբերի 1-ը հռչակել է որպես Բոլոր Սրբերի օր, ցանկանալով անգլիացիներին ետ պահել հեթանոսական սովորույթներից: Սակայն սովորույթն այդպես էլ պահպանվել է և չի հաջողվել այն ջնջել մարդկանց հիշողությունից:

Տոնը սկսվում է Սամհեյնի փառատոնով: Փառատոնի ժամանակ նշում են բույսերի աստվածուհու օրը: Այդ օրը դդումներից լապտերներ են պատրաստում, որպեսզի քաղաքից վտարեն վհուկներին ու չար ոգիներին: Քաղաքից քշում էին չար ուժերին, որպեսզի հաջորդ տարվա բերքն առատ լինի: Երեխաները հավաքվում են ու մարդկանցից քաղցրավենիքներ խնդրում: Չտալու դեպքում նրանք կարող են վնասել: Բոլորը այդ օրը հագնում են զվարճալի կամ սարսափելի հագուստներ, դիմակներ դնոմ: Այժմ այս տոնը վերադառնում է նաև Եվրոպա: Եվրոպական երկրներում այն նշվում է մեծ տոնախմբությամբ` դիմակահանդեսներով:

Հայաստանում տոնը սկսվել է նշվել վերջերս` հանդիսանալով ժամանցային տոն, այլ ոչ թե կրոնական կամ ծիսական:

ՄԻԱԿ-ի գրասենյակում տոնը նշվեց առանձնահատուկ խաղերով և մրցույթներով: Սարսափելի դիմակների և զվարճալի կերպարների բարձր տրամադրությունը փոխանցվել էր նաև հյուրերին: