Դեկտեմբերի 1-ին, Գյումրիում տեղի ունեցավ Միացյալ ազատական ազգային կուսակցության` ՄԻԱԿ-ի II արտահերթ համագուգմարը: Համագումարը բացվեց մանդատային հանձնաժողովի նախագահ Ինգա Հարությունյանի հաղորդմամբ. համագումարի աշխատանքներին մասնակցելու համար ընտրված 135 պատվիրակներից համագումարի աշխատանքներին գրանցվել և մասնակցում էին 130-ը: Համագումարի պատվիրակներին ողջույնի խոսքով դիմեց Շիրակի մարզպետ տիկին Լիդա Նանյանը: Նա ողջունեց համագումարի անցկացումը Գյումրիում և բարձր գնահատեց հայաստանյան քաղաքական կյանքը ապակենտրոնացնելուն ուղղված ՄԻԱԿ-ի ջանքերը:

Համագումարի օրակարգային առաջին հարցը ՄԻԱԿ-ի Գլխավոր քարտուղար Լևոն Մարտիրոսյանի քաղաքական զեկուցումն էր: Լևոն Մարտիրոսյանը հանգամանորեն ներկայացրեց ՄԻԱԿ-ի հիմնադիր համագումարից հետո կատարված աշխատանքները, ներկայացրեց հանրապետության քաղաքական կյանքում ՄԻԱԿ-ի ունեցած դերակատարությունը, անդրադարձավ ՄԻԱԿ-ի առաջիկա ծրագրերին ու անելիքներին:

Լևոն Մարտիրոսյանը նշեց, որ ՄԻԱԿ-ը, որպես նոր սերնդի և ապագայի քաղաքական ուժ, հաջողությամբ լուծել է այս ընթացքում իր վրա դրված հիմնական խնդիրը. հիմնադրվելով ընդամենը 10 ամիս առաջ և մասնակցելով մայիսին տեղի ունեցած խորհրդարանական ընտրություններին, ՄԻԱԿ-ին հաջողվել է ձեռք բերել հանրային մեծ ճանաչում, ՄԻԱԿ-ի առաջ քաշած շատ գաղափարներ ու սկզբունքներ դարձել են լուրջ քննարկումների առարկա, իսկ կուսակցության կողմից հռչակած երկրորդ սերնդի բարեփոխումների իրականացման քաղաքական տեսլականը դարձել է գերակա ՀՀ կառավարության գործունեության ծրագրերում:

Լևոն Մարրտիրոսյանը վերահաստատեց ՄԻԱԿ-ի երկարաժամկետ նպատակը` Հայաստանը դարձնելու ոսկե միլիարդի ժողովուրդների շարքին դասվող երկիր: Լևոն Մարտիրոսյանը վերահաստատեց ՄԻԱԿ-ի հիմնադրման ակունքներում դրված ներկուսակցական ժողովրդավարությունը պահպանելու բացառիկ առաջնայնությունը և բոլոր կուսակցականների հնարավորությունը ընտրվելու ՄԻԱԿ-ի ղեկավար մարմիններում: Այդ համատեքստում, Լևոն Մարտիրոսյանը համագումարի պատվիրակներին տեղեկացրեց իր մտադրությունը` խորհրդի նիստում ներկայացնելու հրաժարական ՄԻԱԿ-ի Գլխավոր քարտուղարի պաշտոնից:

Համագումարում ելույթներով հանդես եկան նաև ՄԻԱԿ-ի քարտուղար Կարեն Մաթևոսյանը, Զարուհի Արմաղանյանը և Սամվել Ֆարմանյանը: Այնուհետև համագումարի պատվիրակներն անցան կուսակցության ղեկավար մարմինների` խորհրդի և քարտուղարության թափուր տեղերի ընտրությանը: Համագումարի կողմից խորհրդի անդամներ ընտրվեցին Արինա Իկլիկյանը, Նանա Բերբերյանը, Զարուհի Արմաղանյանը, Նիկոլ Փիլոյանը, Արթուր Ղարագուլյանը, Լուսինե Հակոբյանը և Վահրամ Ասատրյանը: ՄԻԱԿ-ի II արտահերթ համագումարը որոշում կայացրեց ՄԻԱԿ-ի քարտուղարության անդամների թվաքանակը սահմանել յոթ:

ՄԻԱԿ-ի քարտուղարության, և ի պաշտոնե նաև խորհրդի անդամներ ընտրվեցին Ինգա Հարությունյանը, Սերգեյ Թանթուշյանը և Սամվել Ֆարմանյանը: Այսպիսով, ՄԻԱԿ-ի նոր քարտուղարության կազմը բաղկացած է յոթ, իսկ խորհրդի կազմը` տասնինը անդամներից: Այնուհետև ՄԻԱԿ-ի II արտահերթ համագումարը ընդունեց քաղաքական հայտարարություն: Օրվա քաղաքական անցուդարձից հետո ՄԻԱԿ-ի անդամները նախ Գյումրիում, ապա Երևանում մինչև ուշ գիշեր նշեցին կուսակցության II արտահերթ համագումարի հաջող ավարտը: Բոլոր կուսակցականների մոտ տիրում էր շատ բարձր տրամադրություն:

Երեկոյի ընթացքում հատուկ շնորհակալություն հայտնվեց ՄԻԱԿ-ի բոլոր այն անդամներին, ովքեր մեծ ներդրում էին ունեցել համագումարի նախապատրաստման և փայլուն անցկացման գործում: